LE DUE COMARE
Ciàcole 1993/2008- Jornal O Serafinense-23/08/2001
Le zera stà vissine par pì de venti ani, dopo una ze ndà de star a Mato Grosso. Ma a la fin del ano, quela che ze restà la ga ricevesto 'na leterina de la so comare.
Cara comare...Son pramosa de rivederte. Qua ghe ze sol scorsi e bulgari..Son sfinia e no vedo ora de ritornar par contarte de la me triste vita. Salùteme el compare. No so quando vegnarò catarve. Saluti. Selma.
La Pina la ga piandesto trè ore quando la ga ledesto sta letera. E la ghe risponde:
Carissima Comare Selma...Noantri stemo tuti ben de salute ma magri de soldi. Maledeto goerno. El alsa le tasse e sbassa el prèssio dei prodoti. Anca mi son drio morir de voia de ciacolar con ti, e te aspeto quanto prima. Saluteme el compare. Adio, to comare Pierina.
Passadi diese ani, nel dì de la Pifania, càpita el compare Toni co la comare Selma...Saluti, abrassi, làcrime...
Dopo i compari i va in colonia veder la piantasson e le comare le se la conta:
E el vècio...funsionelo ancora? – Ghe dimanda Selma.
- El sfrugna, el sfrugna ma no fa gnente. – ghe dise Pierina. E el tuo, funsionelo ancora?
-Par dir la verità...el saria ancora brào. Ma quando el riva in quel punto...ghe manca el fià.

TONI E MARIO
Ciàcole 1993/2008- Jornal O Serafinense-12-10-2001
Toni el gà invità Mario e Bepi par ‘ndar in sità far 'na ciuca. I va par el trodo e quando i riva te la giral i ciapa la linea.
-Deme trè bicieri de vin...
E de osteria in osteria i ga bevesto. Fin che rente la sera i pensa de tornar casa.
I riva te la stassion rodoviaria e i monta te la linea e i va a casa. I desmonta e via par el trodo...
-Ma go un bruto mal de pansa...Me toca far na cosa...-dise Mario.
-Ben, ben...vá che te spetemo.
Intanto deventa scuro e sensa ciaro de la luna.
-Movete Mario- ghe dise Toni.
-Ma no son bon de levarme sù- risponde Mario.
-Ben, spe'ta che te giutemo.
I lo ciapa par i brassi ma lu 'l scomissia a osar:Par l’ amor de Dio, dasseme star, volio coparme?
Lora Toni domanda a Bepi:
-Gheto mia un fuminanti? Vedemo cosa el ga.
-Sì che lo go el fuminanti...
E i impissa un fuminanti, e varda e i dise:
-De che maniera vuto levarte su, Mario? Te ghè le scarpe proprio sora le bale, bauco.

BRASIL 2000
Ciàcole 1993/2008- Jornal O Serafinense
Tei giorni de ancoi, la sussede cossita nei bar.
Dise un- Mi domando  un cafè.
Risponde l’ altro- E mi, un guciarin.