LA MUSSA
Ciàcole 1993/2008- Jornal ' O Serafinense'.
Se raconta che insieme al bo e 'l asino intorno a la cula de Gesu Bambin
a Belem, ghe zera anca na mussa che no zera cossì in grado col arrivo
de la Madona e Giusepe. Pì ancora quando Gesù ze sta metesto te la cuna
che zera 'ndove i magnea lori, e ancora i ghe ga tolto le paie par farghe el letin.
La mussa la ga sentio 'na rabia can de sto picinin.
Quando la ga visto che le altre bestiolete le se metea sora par
farghe caldo col alito, la mussa la ghe ze 'nda darente col muso, ma
invense riscaldarlo, la ghe sufiea adosso un fià fredo fin farlo piander.
Quando la Madona la ga visto questo, la ga mandà via la mussa de la
stala e, par ricordarse che la gavea fato piander el Bambin Gesù,
la mussa la ze diventada stèril par sempre.

LA STELA ALPINA
Ciàcole 1993/2008- Jornal ' O Serafinense'.
Quando la Stela ga mostrà ai Maghi la Grota de Belem, un angelo
la ga portà in alto e ghe ga dito che la podea scòier se volesse
'ndar tel ciel o restar te la terra. La stela la ga volesto restar
su la terra e la ga girà par un bon tempo cercando un posto 'ndove
a potesse riposarse par sempre.
Quando la ze passà su par le Alpi la se ga incantà col silensio e col
splendor de la bianca neve.
Cossì la se ga posà su te 'na rocia e l'angelo la
ga trasformà te la Stela Alpina.


LA MADONA E 'L OLIVO
Ciàcole 1993/2008- Jornal ' O Serafinense'.
El olivo ze la pianta de la Madona e ze benedeto chi lo pianta
e lo tende.
Quando la Madona e San Giusepe i scampea in Egito
i soldài i li ga visti col asino e i ze 'ndai
par ciaparli ma quando i ze rivai 'ndove i pensea verli visto,
no i ga catà nessun.
La storia raconta che un olivaro li ga sconti tra i rami,
e ga fato come 'na grota de rami intorno a lori par sconderli.
I soldài i ga cercà de par tuto ma l'olivaro ga faqto in
modo che nessuno potesse veder che el gavea sconto La Sacra Fameia.
E i soldài i ga bio de tornar indrio co le man vode.
El olivaro ga verto lora i rami e liberà i fugitivi.
La Madona ga benedio la pianta e la ga volesto far un riconossimento:
-Ti te si benedeta in eterno, pianta pietosa. Te ghè de 'ver 'na longa vita
e to fruto sarà benèfico e santo a tuti. Te ghè de arder te la luce serena
de la vita e de la morte.
E cossì ze stato:
El olivaro vive tanto tempo e nessun lo taia fin che non more
lu sol, par conto suo.. Col fruto, l'oliva, ze fato 'l òio santo e ancora 'l òio cura
chi se brusa e le so ferite,ancora el brusa te le lampade s-ciarando le note.