LA STÒRIA DEL PEDÒCIO
Ciàcole 1993/2008- Jornal ' O Serafinense'.
Quando ze rivà la ora de Noè meter tute le bèstie su la arca, el gavea tanto da far.
Un mas-cio e 'na femena de ogni spessie, sistemarli tuti a posto,
veder che no mancasse nessun.
In te la gran confusion nessun se ga ricordà del pedocio, ma questo che savea, 'l
ze 'nda rento a la arca e se ga metesto te la testa, soto i cavei
proprio de Noè.
Le acoe le zera ben alte, e piovea che mai quando Noè ga scomissià
a darghe de magnar a tuti, ma ancora nessun se ga ricordà del
pedocio.
Ze passà alcuni giorni fin che sta bestioleta furba e sensa istrussion e che ancora
no gavea el vissio e abito che ga ancoi, ga domandà de magnar a Noè.
-Ma sito chi ti? Ga domandà Noè.
-Mi son el pedocio.
-E cosa vuto?
-Mi vui de magnar.
-Ma mi no savea mia gnanca che te esistissi. Dime 'ndove ti te ghe
metesto fin desso che non gavea gnanca preparà posto par
ti?
- Bern, ga dito el pedocio, pol dassarme quassu, te la to testa, che no me go
mia sentio mal.
-Ma cosa magnito?
-Ben. magnarò quel che cato.
-Ben, ben, rangiate come che te pol...ga rispondesto Noè che zera
stà desmentegon.
E cossita, el pedocio ze stà la. te la testa de Noè, e ga imparà
a far quel che el fa fin ancoi.

EL DILUVIO E LA ARCA
Ciàcole 1993/2008- Jornal ' O Serafinense'.
Quando Noè gavea metesto tute le bèste tel arca, ga anca metesto le piante.
El se ga ricordà ben de la vigna, parchè el gavea magnà la ua. Pensando
che l'acoa la podea disfar, el ga porta quela vigna sul arca.
El diaolo, che proava de tute maniere entrar anca lu nel arca, quando el ga
visto Noè co la vigna, el se ga metesto in meso a le foie de la pianta
e cossi el ze 'nda tel arca anca lu.
Finio el diluvio, el diaolo ze nda in terra co le altre creature
ma el ga dassà qualcosa a la pianta che lo gavea permesso
salvarse su la arca de Noè, salvandose cossita de la ira de Dio.
Lora, le vigne le ze bone de 'ndar strissando anca per terra come
le serpenti, e l'ua fa el vin che, se bevesto in più el fa far dei deliti
e stupidissie....Se diventa ciuchi.
I conta che pena desbarcai dela arca, el diaolo
ga portà a Noe un leon, 'na piegora, 'na simia e un porco e ga dito a Noè:
- Chi beve con moderassiom sarà forte e coragioso come el leon.
-Chi continua a bever diventarà timido e fragil come la piegora.
-Chi continua ancora passando del giusto limite sarà come la simia,
stupido e dispetoso.
-E chi intanto ,beve tanto de pi de la misura giusta, sarà lordo e sguaià, e se
trassinara par terra e tei pantani come un porco.