ME MAMA-
26 otobre 2007 -Omáio par i so 90 ani.
Quando zera picinina son ‘ndà, de scondion, su ‘l sufito e là go catà me mama che la smissiea le vèce e desmentegae cose che la gavea rento al baul.
Son stà ferma, sensa dassar che ela la me vedesse, parché no volea mia romper quel’ aria de nostalgia che mi podea veder su el so viso. E lì me son fermà par un tempo, dassandola coi ricordi de so passata giovenessa.
Ela la gavea i òci fissi in un punto lontan e la stringea al peto, con ‘na man, una picola bambola de pelussia.
Cara mama, che anca ti un dì te sì stata bambina.
Co l’ altra man la passea vanti le foie d’un vècio caderno e subito che la me vede, la resta rossa, le labra seche sensa saver cossa dir, e con un sorriso le se ferma, me varda, e la pensa- go idèa- nel passato, a revìver le emossion del tempo che de romai ‘l ze ‘ndà.
Ma me ga dato na voia de strucarla, de restar nei so brassi che sempre e sempre i me ga acolto col cuor. Ma Dio, che voia de dirghe tante cose che son mai stà bona de dir.
E ela la me vardea e in man la tratenea sto caderno e la so bambola, con ‘na lacrima che vegnea zo nel viso.
Ma Dio, ghe son ‘ndà incontro e la go strendesta col cuor, con tuta la forsa del pì bel sentimento che la me gà sempre inspirà, e la go basada, e go racolto con le me labra quela lacrima che ghe vegnea zo ne la facia.
Me go dato conto che anca ti te ghè bio quei sogni che no torna pì.
Parché, sètu mamma, la vita pimpian, pimpian, la va vanti e se resta sol coi ricordi: ti de la to giovenessa e mi de quei òci quasi spalancài, vardando fisso, sensa dir gnente, ma portanto dentro tuto quel amor che te me ghè sempre donà a mi.
Grassie, Mamma Amélia, par esser me mama.
 

EL PETO ROSSO
Ciàcole 1993/2008- Jornal O Serafinense
Quando Cristo zera drio morir te la Crose, tanti oseleti i zolava de qua e de la intorno a lu, indiferenti. Solo el peto rosso ga bio pietà, el ga fermà el so volo e ga varda el condanà. Dopo, no savendo mia cosa far, el ga volà intorno a la testa sanguinante e fatigosamente ga roto un spin e lo ga tolto via de la corona, liberando anca la testa de Cristo de un de quei dolorosi spini.
'na gossa de sangue la ze ndà fermarse sul peto del oseleto, bagnandole le piume. Cristo lo ga vardà e ga dito che el podea star par sempre con sto segno rosso sul peto, un  ricordo de quel ato
de amor, la macia de sangue cascà del spin.


EL TESTAMENTO DEL VÈCIO PARE
Ciàcole 1993/2008- Jornal O Serafinense
Un bon omo, de romai vecio, el gavea creà 'na grande fameia, dando a tuti una bona casa, un bon laoro, 'na fameia. L’unica cosa, rivando la ora de so morte, zera che i fioi no i zera molto de acordo tra de lori, gnente concordia,e 'na volta morto lu gavaria anca de sparir la eredità.
Quando el ga visto che rivea el fin el ga ciama tuti i fioi vissin al leto disendo che gavea fida a lori el so testamento e che ogni un de lori gavea de presentarse lì con due bei rami de castagno.
Quando i ritorna con i rami, el ghe dise de ogni un darghene una, e cossita, una per una le ga spacà.
Dopo el ga fato darghe ancora l’altro ramo de ogni fiol e metendole insieme, ga proà romperle e nol ze sta bon. E el dise:
-Questa ze la me eredità. Se stè insieme come sti rami nessun potrà farve del mal e un sarà el sostegno de l 'altro. Se no restè insieme, anca un vecio debole come mi sarà bon de farve el mal. Adesso ' ndè e ricordè sempre de questo mio testamento.