11.jpg12.jpg13.jpg14.jpg15.jpg16.jpg17.jpg18.jpg19.jpg20.jpg21.jpg22.jpg23.jpg24.jpg25.jpg26.jpg

Talian

CANTIGA PARA NINAR GABRIELA
COME LA FACIA DE LE ROSE

Vui cantarte 'na cansion del mondo,
fermo le nuvole o le dasso passar
con pì sogni e silensi, pì ale,
picinina, la mama ze qua.

Ma ti te dormi e no te vedi
le parole de amor scrite tei me òci
parché i to òci i ze due grani de note
un orisonte isento e santo, come pochi.

Se te ridi par tuti i venti
tuto el mondo resta pì contento
parché te sì come 'na ebresa de man delicata
tel aria del tempo che segreti i me dise.

De un posto de sol e de nuvole bianche
de rondine che piange solche de nostalgia,
vui cantarte, picinina, una cansion del mondo
parché 'na cansio adesso ze tuto e mi te la canto.

Ti te sì come qualcosa de lusse e vita
e son qua drio cantar prima che vien matina
me la tolo pian e dasso tel me posto na rosa bianca
e tuto el me amor, un grande amor, bambina.

 

MI SON LA ME ÀNIMA

Scolto la ose del tempo che ciama...
Saràla bona de far sparir el dolor e tanti gropi?
Col sospiro sofegà, no son bona capir se el cuor se sgionfa o se svoda.
Me par che le ombre le se ga metesto come un cùcio intorno
e son gnanca bona saver se ze sera, matina o mesdì.
No so se le rose le se sfòia o se lì fora ghe ze foie
che qualchedun ze drio pestarghe dosso.
Mi, che savea el color de tute le staion, son drio meter via te la memoria
par dopo capir se ze un giorno de giugno o se ze stà un spin che me ga spissigà.
Sì... Meto via, un pochetin a la volta come un archivio rento mi.
Prima el to soriso e le to man.
Dopo, el color de tuti i giorni che i ze stà come un aluvion de lusse.
Sì, son drio imparar cose nove...
Son drio imparar a capir e a sentir el respiro de la luna,
el fià de le stele rampicàe tel ciel,la fiama del fogolar che se smorsa,
el odor de la erba bagnada de rugiada, el tanto che gavea de far
e no go mia bio tempo.
I me òci i piande, pian...
E lora, sento un mal che me toca come un pugno sarà sul cuor
e dopo me sgrafa rento e, dolse la se fa ala e ose che me dise:
“Le ale le ga el color del sol
e de drio del campanil ghe ze na farfala giala mesa indormensà.
Sta ferma ti, co sti pensieri e no aver paura.
El silensio, par ti, ze na s-cianta de poesia.
Meti via de memória i color, vanti che vegna scur.
Ma no sta far gnanca tanto caso dei to òci che i se smorsa pian.
Dassa che i smarisse.
Andemo ti e mi, strucade in amor, tel sufion del vento
a impissar giornade, darghe bianco ai muri,
desbroiàr misèrie, far fiorir pensieri,
desmissiar i sogni, cantar de briscolon picole nina nane al tramonto.
Andemo ti e mi, spander caresse te le malinconie,
portar magnar che sa de bon a la fame,
infassar nuvole tei temporài, incrosar le rasse
e sonar campane te la lengoa madre come fusse cansion.
Mi te traverso come un tunel che va vanti pian...
Son la to anima, sempre in viàio.
Prima che la lusse la se stue rento i to òci,
tien le me ale e giremo el mondo.
Saremo estasià e tuto de ti e de mi diventarà miràcol.”