11.jpg12.jpg13.jpg14.jpg15.jpg16.jpg17.jpg18.jpg19.jpg20.jpg21.jpg22.jpg23.jpg24.jpg25.jpg26.jpg

Talian

MI ME CIAMO VENETA BRASILIANA.
3º Premio Poesia Bovolone- VR


Mi parlo ‘na lengua strana
imparà da me mare
che coi so grisi cavei
la tocava el ciel.
Mi parlo ‘na lengua
dal tuto lontana,
portada nel vento
insieme a le nave
e a tute le pene
che i gavea de patir.
Mi parlo la lengua che amo
bagnada de tempo
laoro e onor.
La lengua che i noni,
ancoi guardian del ciel,
i ga portà via come semensa de vita,
e ze stà na gran fadiga
in sento ani mantegner.
Ma qua i me dise
che nessun me capisse,
che son drio sgrafar su un muro,
che devo cambiar pronunsia,
che ‘io mi chiamo’ e no ‘mi me ciamo’
e che la me lengua no la ze pì qua.
Ma mi devo, per caso,
sacrificar la me lengua
a un dio sensa pietà?
Ma sti consigli i ze gnanca speransa,
i ze scarsi de dignità.
Se so che lassù
ghe ze ‘na man che me caressa
co la so assensa nei me òci,
e mi so...mi lo so...
che anca se ghe ze un mar imenso
col so grido che sprofonda anca le galassia,
che fa disperassion su le me spale
tormentandome la inossensa
in un mondo indiferente
a tuto quel che go imparà...
La me lengua...
Ah, la me lengua
ze el me segno de vita,
el fil che me tien sicura la memoria
e la speransa del miracolo.
Parchè quando rivarò lassù,
anca mi, come ti,
te ciamarò ‘mare’
e te me vegnarè incontro
spalancando tute le ombre e costelassion
parchè so, mi lo so che te capirà
la lengua che te me ghè insegnà.


NEI CONFINI DE LA VITA- Segnalazione S.Paolo- Treviso-
In un pugno de terra
brusà del sol
ghe zera le semense del tempo
e mi le vardea
diventando vècia
pian
a rifleterse nei òci tristi
de mia bruna mare.
Le spale
a morir sante
de tanto silensio
e le parole scarse
desolate
nei confini de la vita
che intonava
un conserto d’amor
fra le pareti del’anima.
Un ciel malà
che mi ciamea pupà
el zera la so speransa.
Ma le semense
come le candele
una a una
 le se gà smorsà.
Son restà nela penombra, mama...

 
Copyright © 2009 Solange Maria Soccol. Todos os direitos reservados.
Proibido copiar ou reproduzir este material sem autorização.
Criação: Uniserra.Com