LA COA DEL ASINO

 L’asino, pena crià de Dio el se la ga tolto come el vento par i campi e, sentindo dadrio la coa che sbatea col vento, el dise:
-Ma a che serve sta coa che go de drio? Sarò pì libero sensa.
In fati el ze ndà al Signor e ghe ga domandà de torgheghe la coa che no la servia de gnente.
El Signor, pasiente, lo ga fato e lo ga manda ancora in giro par i campi. Ma pena che el sol ze ndà alto nel ciel e scomisso un caldo, le se ga dismissià le mosche e inseti molesti.
El dadrio del asino ze diventà el pascolo preferito de le bestiace che bechea e che suciava sensa pietà. L’asino saltea, radopiava, ma zera inutil parchè i inseti i ritornea par tormentarlo.
-Ah, Signor, se mi gavesse la coa- el ga dito finalmente vardando el ciel.
E el Signor che sente tuto dal Paradiso, ga spià traversdo na nuvola e ghe dise:
-Gheto capio adesso parchè te servia la coa?
-Signor, go capio, perdonami.
E Dio ga bio pietà e ghe ga dato indrio la coa.
 

SAN GIUSEPE

San Giusepe ze un santo cossita bon che par lu tuti ndaria rento al paradiso. Tempo fa, San Piero lo dassava anca de portiere quando gavea tanto de far, ma ndava rento tuti, anca quei no afidabile, e San Piero  no se fidava pì.
I angeli, un bel giorno, i ga visto che San Giusepe ricordando del so laoro su la terra, el ga fato una scaleta e la ga metesto vissin a la finestra parchè andasse tuti rento quei che San Piero non dassava ndar rento par la porta.
Ze diventà un bacan tel ciel, e ze rivà fin Dio sto caso. Ma far cosa, San Giusepe capia i omeni parchè anca lu zera sta omo e gavea passa per tante.
Davanti questo, Dio ghe ga dito che lu gavaria de dassar el paradiso, parchè lege ze lege par tuti.
-Mi vao- ga dito San Giusepe- ma con el mio.
-Certo- dise Dio.
-Lora, Gesù ze me fiol, lo porto via con mi.
-Oh...ga dito Dio...ma veramente....
-Maria...ndemo. Ti te si me dona e te ve dove va to mario.
-Un momento....dise Dio.
-No go finio. Come la ze Regina Martirum, porto insieme tuti i martiri.
-Ma discutimo...dise Dio.
-Regina Virginun: con mi tute le vergine.
-Speta che se metemo de acordo....
-Regina Patriarcarum, Regina Prophetarum, Regina Sanctorum omnium...
San Giusepe portea via patriarchi, profeti, santi, tuto el paradiso...
-Ben, visto come ze le cose, dise el Signor, te pol restar, ma fa le grassie con un pochetin almanco de discrission.
Da quel tempo, lora, chi vol una grassia veramente, prega a San Giusepe.

EL CAPUCETO ROSSO-  Da estória  ‘ Chapeuzinho Vermelho’
Roberto Mauro Arroque-  Cantada por Sole e Meia 98.

Via par la strada, mi vao mi mi sola
Portarghe i dolseti a casa de me nona
La  ze distante de tuta la gente
Ma ghé un sporchis de un lobo, in volta, via darente.
Ma sul scurire che el sol va via
Restemo mi e me nona a farse compagnia.
Mi son el lobo mau e vui che tuti i lo senta,
mi ciapo i tosatèi per magnarli con polenta.
Ancoi mi son contento, vao far ‘na magnada
Se ciapo la veceta, porco cane, che spansada.
Noantri semo i cassatori, no gavemo paura de gnente
Con un poche de s-ciopetade, faremo bruti spaventi.
Ma sol con una cartucia, se spara ben la carpeta
Spachemo el muso del lobo che ga sbarbà la veceta.