CORÀIO
Ano 2002- Serafina Corrêa- RS
Jornal O Serafinense- ‘Ciàcole’

Zera tempo  de guerra, de s-ciopetade e granate, de bombe a man, che le tonesava da tute le parti. Na sagra de sbari e de s-ciantisi, che gnanca a Serafina quando el Grêmio ze Campion se pol veder e sentir.
E ghe zera assalti a la baioneta, sighi par farse coràio. Um bordel de far indrissar i pèi de la lengoa, ndove gnanca farlo a posta, i pì coragiosi del regimento  i zera lori due: Tonin e so fradel Bepi. Tanto coragiosi che tuti, graduai e soldà, i disea:
-Um fià prima, um fià dopo, i ciaparà la medàia de oro.
-I ga um coràio de ferro.
-I ze sempre i primi a ndar avanti....
Però, no come quela volta che Tonin, a batalia finia, dopo trè giorni che i lo sercava e no trovandolo fra i morti, gnanca fra i ferìi, i lo ga sentìo sigar da sora i monti:
-Ah...son qua....Go fato dodese prigionieri.
No..Quela volta là l' è stà um sbaglio de corsa ritardà, anca parché Tonin, sconto de drio i massi, el continuea a sigar:
-Zelo finio el combatimento?
-Sì...Ze finio...Vien zo.
-Ah...go fato dodese prigionieri....
-Eco!...-ga dito el Capitan- Lo disea mi,  che um fià prima, um fià dopo, el gavaria ciapà la medàia- E cossì, el capitan, e siga forte:- benon, Portali zo i prigionieri. La batàlia ze finia da trè giorni.
-No posso mia, adesso- Ga risposto Tonin.
-Parché?
-Parché i no me lassa vegner.
Eco. Quela volta là, Tonin el gavea fato um sbaglio de anticipo, corendo massa, de là de le linee nemiche, e ritardando dopo, la marcia indrìo.
Ma prima? E ste altre volte, dopo che l' è stà liberà?
Beh...cari. Lu e Bepi i zera sempre i primi a sigar:
-Vanti...Coràio...
E intanto, granate e s-ciopetade le vegnea zo come tempesta. Na granata ze cascà cossì darente a Tonin e Bepi che i ze restai scaraventai in terra, coerti de na piova de sassi. Dopo um fià, Tonin el se ga dismissià fora, e palpando Bepi, el gà domandà com ose de balbo:
-Ci..ci...ciò...Bepi....Si..si...sito ferio?
-Me par de no. E ti...ti?
-No lo so.
-Manco mal...Vanti, alora.
-Ciò...Be..Bepi...Ghe...gheto paura ti?
-Mi no...E ti...ti?
-Gnan...gan...gnanca mi.
-Vanti, alora.
Ma nantra granata, pì tacá de la prima, i li gà sgnacài in meso a um grovejo de spini e de fango. Sta volta ze sta Bepi a dismissiarse par primo, a parpàr Tonin par domandarghe:
-Ciò, Tonin...Si...si...sito ferio?
-No. E ti...ti?
-Mah!
-Vanti alora! Coràio...s stame vissin.
E Tonin, dopo aver balbetà par diese minuti anca dentro le braghe, ciapando a due man tuto el coràio, che sol lu poedea aver, el ga domandà:
-Ciò....Bepi....
-Dime...
-Spu....spùsselo el sangue?
-Mah...No lo so. Parché?
-Parché se el spussa, a son...son....ferio da tute le parti.